അഗളിയിൽ നിന്നും.......

 1/6/2021
ചൊവ്വ

കുട്ടികളെ ,🌷

എല്ലാവരും ഇന്ന് വളരെ സന്തോഷത്തിലാണല്ലോ.... പുത്തനുടുപ്പും, നോട്ടുപുസ്തകവും , ആകർഷകമായ  പാഠപുസ്തകവും , ബാഗും,  പെൻസിലും  കിട്ടിയ സന്തോഷമാണോ ?  അതോ..മഴയത്ത് വെള്ളത്തുള്ളികൾ തെറുപ്പിച്ച്  ഉത്സാഹത്തോടെ വിദ്യാലയത്തിലെ കാഴ്ചകൾ  കൺനിറയെ  കാണാനുള്ള  കൗതുകമാണോ...?

മധുരോർമ്മകൾ പുഞ്ചിരി വിടർത്തുന്ന  അക്ഷരലോകത്തേക്ക്  പുതിയതായി  എത്തിയ കുരുന്നുകൾക്കും ,  ക്ലാസ്സ്‌കയറ്റം  നേടി പുതിയ ക്ലാസ്സുകളിലെ  പുത്തൻ അനുഭവങ്ങളിലേക്ക്  ചുവടുവെക്കുന്ന എന്റെ എല്ലാ പ്രിയപ്പെട്ട വിദ്യാർത്ഥികൾക്കും ഇത്തിരി ദൂരത്തു നിന്നും ഒത്തിരി സ്നേഹത്തോടെ വിജയാശംസകൾ.

അച്ഛനും അമ്മയുമൊത്തുള്ള കളിചിരികളും, കൊച്ചു കൊച്ചു തമാശകളും, ഇണക്കവും പിണക്കവും , കൂട്ടുകാരോടൊപ്പമുള്ള അടിപിടികളും,  ഏട്ടനും ചേച്ചിയും,  അനിയനും അനിയത്തിയുമൊത്തുള്ള      കുട്ടി കുറുമ്പുകളും   നിങ്ങൾക്ക് സമ്മാനിച്ച ഓരോ നിമിഷങ്ങൾ നിറമാർന്ന അനുഭവങ്ങളുടെ മനോഹരദിനങ്ങളാണ്...

മുത്തശ്ശനോടും, മുത്തശ്ശിയോടും സംസാരിച്ചിരിക്കാൻ എന്തു രസമാണല്ലേ. അവർ പറയുന്ന ഓരോ കഥയും, അവരുടെ പ്രവൃത്തികളും, ഉപദേശവും, സ്നേഹ വാത്സല്യവുമെല്ലാം ഉൾക്കൊണ്ട്‌ നന്മ നിറഞ്ഞ പ്രവൃത്തിയിലൂടെ, ചിന്തകളിലൂടെ, നല്ല ശീലങ്ങളിലൂടെ, സംസാരത്തിലൂടെ നിങ്ങളുടെ സ്വപ്നങ്ങളിലേക്ക് ചുവടുവെക്കണം.  
ഒരുപാട്  വിശേഷങ്ങൾ  നിങ്ങൾക്ക്  കൂട്ടുകാരോടും  അധ്യാപകരോടും  പറയാനില്ലേ ?
മധുരമൂറുന്ന മാമ്പഴത്തിന്റെ,  അമ്മ ഉണ്ടാക്കി തന്ന രുചിയൂറും  വിഭവങ്ങളുടെ, തൊടിയിലെ  വരിക്കപ്ലാവിലെ ചക്കയുടെ , മഴയത്ത് തുള്ളിക്കളിച്ചതിന്റെ, അടുക്കള തോട്ടത്തിന്റെ, ഇഷ്ടമുള്ള പുസ്തകം വായിച്ചതിന്റെ...അങ്ങനെ എന്തെല്ലാം കാര്യങ്ങൾ.
 കോവിഡിന്റെ ഭീഷണി ദിനംപ്രതി  രൂക്ഷമാവുന്നു.
എങ്കിലും പ്രതിസന്ധികളെ   നമ്മൾ അതിജീവിക്കും.
മനം കവരുന്ന നിറങ്ങളാൽ, പുതുമോടിയിൽ, ഹൈടെക്കായി, നിങ്ങൾക്ക്  ആടാനും  പാടാനും , കളിച്ചുല്ലസിച്ച് പുതു പാഠങ്ങൾ പഠിക്കാനും,  അധ്യാപകരോടും  കൂട്ടുകാരോടും കൂട്ടുകൂടാനും,  പുതുമണം  മാറാതെ വിദ്യാലയങ്ങൾ  നിങ്ങൾ വരുന്നതും  കാത്തിരിപ്പാണ്....
ഓൺലൈൻ  പഠനം  മാറ്റങ്ങളോടെ , പുതുമകളോടെ, രസകരമായ  പഠനാനുഭവങ്ങളാണ്  നിങ്ങൾക്ക്  ഒരുക്കിയിരിക്കുന്നത്.  ടിവിയും , യുട്യൂബും, വാട്സ് ആപ്പും, ഇന്റർനെറ്റും ഉൾപ്പെടെയുള്ള  സൗകര്യങ്ങൾ  പരമാവധി  പ്രയോജനപ്പെടുത്തി ഓൺലൈൻ  ക്ലാസ്സുകൾ  കാണുക.
     നമുക്ക്  ചുറ്റുമുള്ള പ്രകൃതിയിലേക്കൊന്ന് കണ്ണോടിച്ചു നോക്കൂ...
പൂക്കളോടും , മരങ്ങളോടും, പക്ഷികളോടും, കിന്നാരം  പറഞ്ഞ് ,  ചിത്രശലഭങ്ങളുടെ  വൈവിധ്യം  ആസ്വദിച്ച്.... നമുക്ക്  പഠിക്കേണ്ട  പാഠങ്ങൾ  കണ്ടും, കേട്ടും, തൊട്ടറിഞ്ഞും , ആസ്വദിച്ചും,  പാഠപുസ്തകത്തിന്റെ  മൂല്യങ്ങൾ  ജീവിതത്തിൽ  പകർത്താൻ  പുതിയ  അധ്യായനവർഷത്തെ  നമുക്ക്  പുഞ്ചിരിയോടെ  വരവേൽക്കാം.

ശുഭപ്രതീക്ഷയോടെ  ഒത്തൊരുമയോടെ  മുന്നേറാം.


അഞ്ജു. സി. ആർ
ശ്രീകൃഷ്ണപുരം.